Жаңалықтар

СТУДЕНТТІК ПАРЛАМЕНТ АЙНАСЫ

       Құлан агротехникалық жоғары колледжінде 1- ші  және  2- ші курс студенттері арасында «Сыбайлас жемқорлық  - қоғам дерті!» тақырыбында  сурет байқауы ұйымдастырылды.

ТЕҢГЕ –ҰЛТТЫҚ ТАБЫСТЫҢ КЕПІЛІ

     Құлан агротехникалық жоғары колледжінде 15 қараша Ұлттық валюта күніне орай «Теңге –ұлттық табыстың кепілі» тақырыбында 1курс студентерімен танымдық сағат өткізілді. Студенттерге Қазақстан Республикасы Тәуелсіздігінің ажырамас атрибуты теңгенің тарихы, өзгеруі мен түрленуі жайында және ұлттық ақша айналымы жөнінде ақпарат берілді. Қатысушы жастар арасында валюталық қарым-қатынастарды нығайтудағы теңгенің қызметі, қолданыстағы маңызы сынды мәселелер айтылды.

СТУДЕНТТІК ПАРЛАМЕНТ АЙНАСЫ

     Құлан агротехникалық жоғары колледжінде Халықаралық студенттер күніне арналған Студенттік парламенттің салтанатты жиыны өткізілді. Жиында студенттердің өзін-өзі басқарудың өзекті мәселелері талқыланып, жұмысты өзектендіру бойынша тың идеялар ұсынылды. 

БАНК ҚЫЗМЕТІМЕН ТАНЫСУ

     Құлан агротехникалық жоғары колледжінің «Ет өнімдерінің өндірісі» мамандығының 1 курс студенттері  15- қараша Ұлттық валюта күніне орай  «Қазақстан халық банкі» АҚ  Т.Рысқұлов аудандық  басқармасына саяхат жасады.  Басқармасы басшысы Тоғжанова Күлпаш банктік қызметтің негізгі түрлері мен функцияларын таныстырып, сонымен қатар, қалай табысты банкир болудың қыр-сырымен бөлісіп, банктік қызмет жұмыстарымен,  ұлттық теңгенің шығу тарихымен таныстырды.

ЖҰМЫС БЕРУШІ КҮНІ ӨТКІЗІЛДІ

          15 қараша күні Құлан агротехникалық жоғары колледжінде кадрларды даярлау сапасын арттыру, жұмыс берушілермен одан әрі тиімді өзара іс-қимыл жасау мақсатында техникалық және кәсіптік білім  беру ұйымдарында «Жұмыс беруші күні» іс-шарасын өткізу тұжырымдамасына сәйкес үлкен жиын өткізілді.

          Кездесудің  тәжірибе алаңында жұмыс берушілер колледждің «Ветеринария»,  «Агрономия» құзыреттілік орталықтарының қызметімен танысып, ағымдағы оқу жылында жабдықталған «Пісіру технологиялары» құзыреттілік орталығын салтанатты ашты.

         Жиынның диалог алаңында директордың орынбасарлары Е.Алибаев «Академиялық дербестік шеңберіндегі кәсіпорындармен өзара іс-қимылдар жасаудың нормативтік құқықтық актілері»,  Р.Ташыбаева «Сенімді әлеуметтік серіктес – сапалы білім негізі» тақырыптары бойынша ой қозғап, жұмыс берушілерді пікіралмасуға тартты. Өз кезегінде колледждің әлеуметтік серіктестері «SV Agro» ЖШС агроном-менеджері Р.Мирхадиров,  «Меркі ірімшік зауыты» ЖШС технологы К.Еримбетова, Қарақыстақ ауылдық округінің ветеринарлық пунктінің басшысы М.Абдикулов, «Шәушен» ШҚ басшысы Б.Қодасова жетекші кәсіпорынның жұмыс тәжірибесімен бөлісіп, студенттердің кәсіптік практикасының барысын презентациялады, маман даярлау сапасын жақсарту бойынша оқу орнымен бірлескен іс-шараларға тоқталды.

           Жұмыс беруші мен оқу орны арасындағы келіссөздер мақсатты мемлекеттік білім беру тапсырысы; кәсіпорындарда оқытушылардың тағылымдамасы; жас маманды жұмысқа қабылдау мәселелері аясында өткізілді. Т.Рысқұлов ауданы әкімдігінің ауыл шаруашылығы бөлімінің басшысы Т.Бигазиев, Жамбыл облысының Кәсіпкерлер палатасының Т.Рысқұлов ауданындағы филиалының басшысы  Қ.Ускенбаев, ҚР АШМ  Ветеринариялық бақылау және қадағалау комитетінің Т. Рысқұлов аудандық аумақтық инспекциясының басшысы  А.Утебаев, колледж Қамқоршылық кеңесінің төрағасы Қ.Бижанов түлектердің жұмысқа орналасу мәселесіне, мемлекет тарапынан осы бағытта атқарылып отырған жұмыстарға тоқталып, түсініктеме берді.

          Мерекелік жиын барысында оқу орны мен «Шәушен» шаруа қожалығы, "SV AGRO" жауакершілігі шектеулі серіктестігі арасында «Мамандарды   мақсатты  даярлау   туралы» шартқа қол қойылды.

           Кездесудің соңында үздік жұмыс берушілер Қазақстан Республикасы Оқу-ағарту министрлігінің, «Атамекен» Кәсіпкерлер палатасының, Құлан агротехникалық жоғары колледжінің алғыс хаттарымен марапатталды.

ҒАБИДЕН МҰСТАФИНГЕ – 120 ЖЫЛ

      Құлан агротехникалық жоғары колледжінде халқымыздың әйгілі жазушысы, қоғам қайраткері Ғабиден Мұстафиннің 120 жылдығына арналған «Даусы дәуірмен ұласқан қаламгер» тақырыбында тағылымы мол, мазмұнды іс-шара өтті. Т.Рысқұлов аудандық орталық кітапханасымен бірлескен тақырыптық кеш барысында жазушының өмірі мен шығармашылығы туралы құнды деректер айтылып,  студенттер көркем сөздің хас шебері атанған қыл қалам шеберіне арналған жазушылардың арнау өлеңдерін мәнерлеп оқыды. Сондай-ақ Мұстафиннің өмірі мен шығармашылығын дәріптейтін бенефильм көрсетіліп, кітап көрмесіне библиографиялық шолу жасалды.

СТУДЕНТТІК ПАРЛАМЕНТ АЙНАСЫ

      Құлан агротехникалық жоғары колледжінде «Жас қыран» жастар қанатыңың жетекшісі Қалмаханбет Алишер жастар тарапынан сыбайлас жемқорлықты жою мақсатында студенттер арасында жастардың жаңаша ойлауын, бәсекеге қабілеттілігін ояту, студент жастар арасында сыбайлас жемқорлыққа қарсы мінез құлықты қалыптастыру бағытында құрылған колледжішілік «Жас қыран» жастар қанаты клубының жиналысы өткізіліп, жұмыс жоспары талқыланды.

СТУДЕНТТІК ПАРЛАМЕНТ АЙНАСЫ
      Құлан агротехникалық жоғары колледжінде 15 қараша Ұлттық валюта күніне орай «Ұлт мақтанышы – ұлттық валюта» тақырыбында  пікірсайыс өткізіледі. Пікірсайыста, Тәуелсіздігіміздің бейнелерінің бірі болған, төл теңгеміздің шығу тарихы мен айналымдағы орны туралы пікірлер,  өткір ойлар, нақты дәлелдер келтірілді.  Дебаттың қорытындысы бойынша «Алға» тобы жеңімпаз атанса, «Жас Қыран» тобына алғыс білдірілді,  ал пікірсайыстың «Үздік спикері» болып Нұрланұлы Ернур  атанды.

ПЕДАГОГИКАЛЫҚ ИДЕЯЛАР ПАНОРАМАСЫ БАЙҚАУЫНЫҢ ЖЕҢІМПАЗДАРЫ

     Біріңғай ақпараттық білім кеңістігінде заманауи педагогикалық тәжірибе жинақтап, насихаттау және педагогтердің ақпараттық-коммуникациялық құзіреттілігін арттыру мақсатында ұйымдастырылған «Педагогикалық идеялар панорамасы» Республикалық байқауының Аймақтық кезеңінде Құлан агротехникалық жоғары колледжінің оқытушылары қатысып, кәсіби шеберліктерін шыңдай отырып:

-IІ орын жүлдесін - К.К.Еримбетова,

-IІI орын жүлдесін - Г.Т.Саркулова иеленді.

    Әріптестерімізге білім беру және жастарымызды тәрбиелеу жолындағы істеріне толағай табыстар тілейміз!!!

«БҮГІНГІ ҚЫЗ БАЛА – БОЛАШАҚ ҰРПАҚ ТӘРБИЕЛЕЙТІН АНА»

    Құлан агротехникалық жоғары колледжінде қыз балаларға рухани – адамгершілік тәрбие беру, қыздардың жеке бас гигиенасы, ерте жүктіліктің, зорлық-зомбылықтың алдын алу, қыздардың репродуктивті денсаулығын қалыптастыру мақсатында тәрбие бөлімінің ұйымдастыруымен «Бүгінгі қыз бала –болашақ ұрпақ тәрбиелейтін ана» тақырыбында Т.Рысқұлов аудандық ауруханасының акушер маманы Б.Туленбаева және СӨСҚ орталығының медбикесі М. Бакирова, колледждің ата-аналар комитетінің төраймы А.Маханбеталиева, жастар денсаулық орталығының психологы А.Турбекованың қатысуымен кездесу өтті. Кездесу барысында жасөспірім қыз балалар арасында жиі кездесетін келеңсіз жағдайлары туралы мәселелер талқыланып мамандар тарапынан толық мәліметтер беріліп жадынамалар таратылды. Ата-аналар төрайымы қыз балаларға аналық кеңесін берсе, жастар орталығының психологы студенттермен тренинг жүргізіп түрлі ситуациядан шығу жолдары туралы түсіндіріп кетті. Студенттер дәрігерлерге ойларында жүрген сауалдарын қойып пікір алмасты. 

ҚҰҚЫҚТЫҚ ДӘРІС ӨТКІЗІЛДІ

         Құлан агротехникалық жоғары колледжінде   жасөспірімдердің құқықтық мәдениетін қалыптастыруға бағытталған мобильдік топтың мүшесі, тарих пәнінің оқытушысы Сүгірбекова Айнұр «Кәмелетке толмағандардың құқықтық мәдениеті» тақырыбында 1 курс  студенттеріне дәріс өткізді.

          Дәрісте  қылмыстық жауаптылықтың, есірткі қылмысының алдын алу, зорлық-зомбылықтың құрбаны болып қалмау және өз құқықтарын қорғау үшін қайда жүгінуге болатынына түсіндірме жұмыстары жүргізілді. Яғни, студенттерге  құқықтарын қорғау үшін енгізілген өзгерістер, қылмыстық жауаптылық басталатын жас мөлшері, есірткі заттарын тұтынудың денсаулыққа тигізетін зияны жайында кеңінен айтылды.  

СТУДЕНТТІК ПАРЛАМЕНТ АЙНАСЫ

    Студенттік парламент мүшелерінің ұйымдастыруымен Құлан агротехникалық жоғары колледжінде білім алушылар арасында шығармашылық, достық қарым-қатынасты күшейту мақсатында

    «Студенттік көңіл» атты Жайдарман сайысы өткізілді. Ойын барысында студенттер актерлік шеберлігі, ұтымды қалжындары арқылы көрерменнің көңілінен шықты.

    Көңілді тапқырлар клубының сайысына 7 команда қатысып, нәтижесінде «Себастьян» командасы (1к 1т Ветеринария мамандығы) бірінші орынды, «Электромонтер» командасы (1к 1т Электромонтер мамандығы) екінші орынды, «Сұңқар» командасы (1к 2т Ветеринария мамандығы) үшінші орынды иеленді. Жеңімпаздар мен қатысушылар грамота және алғыс хаттармен марапатталды

СТУДЕНТТІК ПАРЛАМЕНТ АЙНАСЫ

     Студенттік парламент мүшелерінің ұйымдастыруымен Құлан агротехникалық жоғары колледжінде «Сыбайлас жемқорлықты жоюға болады ма?» деген тақырыпта пікір-сайыстың іріктеу кезеңі өтті. Жемқорлықтың алдын алу және оған жол бермеу мақсатында өткізілген сайыста студент жастардың ой-пікірлерін ортаға салынып, кеңінен талқыланды

КЕМЕҢГЕР ТҰЛҒА – Д.А.ҚОНАЕВ 110 ЖАСТА

   Құлан агротехникалық жоғары колледжінде тарих пәнінің оқытушысы Г.Сабдраимованың ұйымдастыруымен ұлтымыздың жанашыры болған кемеңгер тұлға Д.А.Қонаевтың 110 жылдығына арналған «Дана тұлға, дара тұлға – Д.А.Қонаев» тақырыбында дөңгелек үстел өтті. Дөңгелек үстел барысында Дінмұхамед Ахметұлының саяси қызметі, еліміздің өркендеуіне қосқан үлесі мен ұстанған саяси идеологиясы туралы көптеген деректер талқыланыды.

КӘСІБИ ДОДА МӘРЕСІНЕ ЖЕТТІ

     Екі күнге созылған ауылшаруашылығы саласындағы ТжКБ педагогтері арасындағы Республикалық кәсіби шеберлік конкурсы мәресіне жетті. Қазақстанның әр өңірінен келген өз мамандығының майталмандарына және жюри мүшелеріне Жамбыл облысы әкімдігі білім басқармасының ТжКБ дамыту орталығының басшысы Д.Есжанов және Т. Рысқұлов ауданы әкімдігінің ауылшаруашылығы бөлімінің басшысы Т.Бигазиев облыстық білім басқармасының алғыс хаттарын тапсырды.

    Кәсіби дода барысын саралай келе әділқазылар алқасы конкурс нәтижесін шығарды:

Агрономия саласы бойынша Бас жүлдені - Түркістан облысы Түркістан жоғары көпсалалы аграрлық колледжінің оқытушысы Мәмбет Бейбіт Тәуіржанұлы; І орынды - Түркістан облысы Қапланбек жоғары аграрлық -техникалық колледжінің оқытушысы Қалдасов Азамат Тенжалиевич;

    ІІ орынды - Жамбыл облысы Құлан агротехникалық жоғары колледжінің оқытушысы Ятаев Марат Дуйсенханович; ІІІ орынды - Павлодар облысы Ертіс жоғары инновациялық аграрлық колледжінің оқытушысы Абдинов Нұржан Сабитович иеленді.

Ветеринария саласы бойынша Бас жүлдеге - Түркістан облысы Қапланбек жоғары аграрлық-техникалық колледжінің оқытушысы Назиева Гульжан Зулпакаровна; І орынға - Жамбыл облысы Құлан агротехникалық жоғары колледжінің оқытушысы Байсакалова Жанар Болатовна; ІІ орынға - Алматы қаласы Еуразия аграрлық колледжінің оқытушысы Мұхаметқалиев Айдар Қайратұлы;

    ІІІ орынға - Жамбыл облысы Қордай ауылшаруашылығы колледжінің оқытушысы Нуриев Талғат Нуриевич лайықты деп табылды.

    Әділқазылар алқасының мүшелері және конкурстың қатысушылары ҚР Оқу-ағарту министрлігінің және Жамбыл облысы әкімдігі білім басқармасының ауылшаруашылығы саласы бағытындағы оқу орындарына көрсеткен сенімі мен қолдауын жоғары бағалап, Құлан агротехникалық жоғары колледжі ұжымының республикалық конкурсты ұйымдастыру деңгейіне ризашылығын білдірді.

КОЛЛЕДЖ ОҚЫТУШЫЛАРЫ ЖЕҢІМПАЗ АТАНДЫ

     Қазақстан Республикасы Оқу - ағарту министрлігінің ұйымдастыруымен 27-28 қазан аралығында Құлан агротехникалық жоғары колледжінің базасында өткізілген Техникалық және кәсіптік білім беру ұйымдары педагогтері арасындағы ауылшаруашылығы саласы бойынша ІІ-ші Республикалық кәсіби шеберлік конкурсында колледж оқытушылары Байсакалова Жанар Болатовна ветеринария саласы бойынша 1 орын жеңімпазы атанса, агрономия саласы бойынша Ятаев Марат Дуйсенханович 2 орын жүлдегері атанды.

     Әріптестерімізді жеңістерімен құттықтап, шығармашылық табыс пен сәттілік тілейміз!

 

КОНКУРСТЫҢ ПРАКТИКАЛЫҚ КЕЗЕҢІ

    Қазақстан Республикасы Оқу-ағарту министрлігінің ұйымдастыруымен Құлан агротехникалық жоғары колледжі базасында өтіп жатқан Республикалық кәсіби шеберлік конкурсының екінші күні қатысушылардың практикалық модульдердің тапсырмаларын орындаумен жалғасуда.

    Конкурстың практикалық кезеңі әрбір модуль бойынша бір немесе бірнеше тапсырмадан тұрады. Конкурс маманның өз бейіні бойынша кәсіби құзыреттілігін бағалауға мүмкіндік береді. Практикалық кезеңнің байқалатын аспектілері: іс-қимылдардың дәйектілігі, орындаудың дұрыстығы, сала стандарттарының талаптарының сақталуы, орындалу уақыты, өз іс-қимылдарының негіздемесі.

КӘСІБИ ДОДА БАСТАУЫН АЛДЫ

     Қазақстан Республикасы Оқу - ағарту министрлігінің бекіткен ережесіне сәйкес Құлан агротехникалық жоғары колледжі базасында Техникалық және кәсіптік білім беру ұйымдарының педагогтері арасында ауыл шаруашылығы саласы бойынша Республикалық кәсіби шеберлік конкурсы басталды. 27-28 қазан аралығында өтетін конкурсқа еліміздің 13 өңірінің 15 колледжінен ветеринария және агрономия мамандықтары бойынша 22 педагог қатысуда.

    Республикадағы ауыл шаруашылығы секторын дамыту жағдайында ауыл шаруашылығы саласындағы ТжКОБ ұйымдарының неғұрлым талантты педагогтерін анықтау және қолдау мақсатын көздейтін конкурстың барысында қатысушы педагогтер 6 модульді қамтитын теориялық және практикалық тапсырмаларды орындауда.

Конкурстың теориялық кезінде арнайы пәндер бойынша мазмұнды қамтитын тест сұрақтарына жауап берілді және тәжірибелік жұмысты орындау кезіндегі іс-қимылдардың бірізділігін құрастыру тапсырмалары орындалды.

    Конкурстың практикалық кезеңі әрбір модуль бойынша бір немесе бірнеше тапсырмадан тұрды және жұмыстарды бағалауда келесі аспектілер ескерілді: іс-қимылдардың дәйектілігі, орындаудың дұрыстығы, сала стандарттарының талаптарының сақталуы, орындалу уақыты, өз іс-қимылдарының негіздемесі.

     Әділқазылар алқасының байқауға қатысушылардың кәсіби шеберлігін бағалау электронды түрде жүргізілуде.

РЕСПУБЛИКАЛЫҚ КӘСІБИ ШЕБЕРЛІК КОНКУРСЫ

     2022 жылдың 27-28 қазан аралығында Құлан агротехникалық жоғары колледжінің базасында Қазақстан Республикасы Оқу - ағарту министрлігінің ұйымдастыруымен техникалық және кәсіптік білім беру ұйымдарының педагогтері арасындағы ауылшаруашылығы саласы бойынша ІІ-ші Республикалық кәсіби шеберлік конкурсы өткізіледі. Ветеринария және Агрономия саласы бойынша байқауға қатысуға Қазақстанның 12 облысының 15 колледжінен 22 үміткер ниет білдірді