Жаңалықтар

ХАЛЫҚҚА ҚЫЗМЕТ-БАСТЫ МІНДЕТ!

    Құлан агротехникалық жоғары колледжінің базасында ауданның ірі шаруашылықтарымен ұйымдастырылған бас қосуда бірқатар өзекті мәселе қаралып, негізгі бағыт айқындалды.

Атап айтсақ, аудан әкімдігі, жұмыс беруші мен 100 жылдық тарихы бар білім ордасы арасында келісімге келіп, келісімшарт нәтижесінде аудандағы жұмыссыздық деңгейін төмендету, шаруашылықтарға қажет мамандар тапшылығын жою, жұмыссыз жастар санын азайту сынды мәселелер қамтылмақ.

     Яғни, жергілікті атқарушы орган мен колледж бірлесе отырып қажетті де білікті мамандарды даярлауды қолға алса, жұмыс беруші ол азаматтарды жұмыспен қамтуға міндеттеме алып, “Nomad”, “Луговой жылқы зауыты”, “Керең”, “Шәушен” шаруа қожалықтары мен аудандық ветеринариялық станциясы меморандумға қол қойып отыр.

Сонымен қатар, білім беру мекемесінің мүмкіндіктері мен заманауи қондырғылары жұмыс берушілерге арнайы, көрнекі түрде таныстырылып, сапалы да білікті мамандарды дайындауға толық мүмкіндіктері бар екендігін жеткізді.

    Осынау маңызды да мағыналы өткен жиынның қорытындысымен тараптар бірлесіп жұмыс атқаруға ниетті болып тарқасты. Демек, келелі кездесу нәтижелі өттіп, алдағы уақытта өз шешімін табады деп айтуға толық негіз бар.

    Біздің басты міндетіміз - халықтың әл ауқатын арттыру үшін жұмыс орындарын құрып, жұмыссыздар санын азайту. Сондықтан, осы бағыттағы жұмыстарға бар күш-жігерімізді салуымыз қажет.

ҚЫСҚЫ ПЕДАГОГИКАЛЫҚ ОҚУЛАР
           Құлан агротехникалық жоғары колледжінің әдістемелік жұмыс жоспарына сәйкес «Заманауи білім беру: жаңа уақыт - жаңа көзқарас» тақырыбында қысқы педагогикалық оқулар өткізілді. Заманауи талаптарға сәйкес болашақ мамандардың кәсіптік  құзіреттіліктерін  қалыптастыруда колледж оқытушыларының инновациялық қызметін дамыту мақсатында өткізілген іс-шара 3 бағыт бойынша ұйымдастырылды. Колледждің 27 педагогі білім берудің өзекті мәселелерін шешудегі үздік тәжірибені көрсетіп, жаңғыртылған білім мазмұнын іс-тәжірибеге енгізу әдістемесін көрсетті.

АЙТМАТОВ ОҚЫҒАН ТЕХНИКУМ

    «Адамзаттың Айтматовы» атанған заманымыздың заңғар жазушысы өмірден өткенге дейін Жамбыл жерін ешқашан есінен шығарған емес. Дәуірдің дарабозы 1945-1948 жылдар аралығында Жамбыл зооветеринариялық техникумында білім алып, зоотехник мамандығы бойынша үздік бағаға бітірген.

     Ол кезде аталмыш оқу ордасы бұ­рынғы Жамбыл қаласында болса, қазіргі таңда Тұрар Рысқұлов ауданының орталығы Құлан ауылында орналасқан. Атауы да өзгерген. Қазіргі таңда ол Құлан агротехникалық колледжі деп аталады.

«МЕНІҢ ӨМІРІМДІ ӨЗГЕРТКЕН КІТАП» ТАҚЫРЫБЫНДАҒЫ ЭССЕ КОНКУРСЫ

         Құлан агротехникалық жоғары колледжінде «Оқуға құштар колледж» бағдарламасын жүзеге асыру аясындағы 1 курс студенттері арасында «Менің өмірімді өзгерткен кітап» тақырыбындағы эссе жазудан конкурс өткізілді. Конкурстың мақсаты білім алушылардың көркем шығармаларды оқуға деген ұмтылыстарын арттыру, сыни және логикалық ойлау дағдыларын дамыту, әдеби тіл байлығын кеңейту. Байқауға қатысқан ойы ұшқыр,сөзі көркем студенттер дипломдармен және алғыс хаттармен марапатталды.

«РОБОТТЫҢ АДАМҒА ПАЙДАСЫ» ТАҚЫРЫБЫНДАҒЫ ДӨҢГЕЛЕК ҮСТЕЛ

        М.Х.Дулати атындағы Тараз өңірлік университетінің «Физика және ІТ» кафедрасының «Робототехника» студенттік ғылыми үйірмесі ұйымдастырып отырған «Роботтың адамға пайдасы» тақырыбындағы дөңгелек үстел форматындағы ашық отырысқа колледждің студенттері Р.Мороз (жетекші Б.Рахметалиев) және А.Егізбаев (жетекші А.Бекназарова) қатысып сертификаттарға ие болды.

СТУДЕНТТІК ПАРЛАМЕНТ АЙНАСЫ

       Құлан агротехникалық жоғары колледжінде  студенттік парламенттің ұйымдастыруымен «Салауатты өмір салтын ұстану денсаулық кепілі» атты спорттық жарыс өтті. Жарыс барысында гимнастикалық жаттығулар жасай отырып, арқан тарту, кол күрес, гир көтеру мен қатар қашықтыққа жүгіру, биіктіктен секіру жаттығуларын жасап командалық сайысқа түсті. Нәтижесінде жүлдегер командалар анықталып, марапатталды.

СТУДЕНТТІК ПАРЛАМЕНТ АЙНАСЫ

   Студенттік парламент мүшелерінің ұйымдастыруымен Құлан агротехникалық жоғары колледжінде «Атақты адамдар жақсы үлгі бола ма, жоқ па?» деген тақырыпта пікір-сайыс  өтті.  Дебат барысында еліміздің атақты хандары, әділ билері, ақын жазушылары жас ұрпаққа үлгі боларлықтай қасиеттері  кеңінен талқыланып, білім алушылардың сөйлеу шеберліктері шыңдалды.

СТУДЕНТТІК ПАРЛАМЕНТ АЙНАСЫ

      Құлан агротехникалық жоғары колледжінде Қазақстан Республикасының Тәуелсіздік күніне орай Студенттік парламенттің салтанатты жиыны өткізілді. Жиында ата -бабаларымыздың арманы болған азаттықтың ауыр жолын тарихи деректер арқылы талқылай отырып, елін, жерін сүйетін, мемлекетіміздің гүлденуіне өз үлестерін қосатын тұлға болуға шақырды. Сонымен қатар студенттердің өзін-өзі басқарудың өзекті мәселелері талқыланып, жұмысты өзектендіру бойынша тың идеялар ұсынылды.

«ЖЕЛТОҚСАН- ТӘУЕЛСІЗДІКТІҢ БАСТАУЫ» АТТЫ  МӘНЕРЛЕП ОҚУ БАЙҚАУЫ

      Құлан агротехникалық жоғары колледжінде 16 желтоқсан – Тәуелсіздік мерекесіне орай дүниені дүр сілкіндіріп, тәуелсіздік туын ең алғаш көтерген әйгілі желтоқсан оқиғасына арналған «Желтоқсан- тәуелсіздіктің бастауы» атты  қазақ және орыс тілдерінде мәнерлеп оқу байқауы өтті. Байқауға 15 студент қатысып, ата-бабаларымыз ғасырлар бойы армандаған тәуелсіздік туралы өлеңдер оқыды. Әділ қазылар шешімінің қорытындысымен Қазақ тілі пәні бойынша:

1 орын – Өсербаева Аяужан 4 курс «Агрономия» мамандығының студенті

2 орын – Тұрсынбай Жанерке 3 курс «Аспазшы» мамандығының студенті

3 орын – Есенгелді Алинур 1 курс «Агрономия» мамандығының студенті марапатталды.

Орыс тілі пәні бойынша:

1 орын – Хамидолла Ернар 1 курс «Ветеринария» мамандығының студенті

2 орын  Әлі Елжан 1 курс «Ветеринария» мамандығының студенті

3 орын – Тұрсынбек Айғаным 1 курс «Ветеринария» мамандығының студенті марапатталды.

ҚҰҚЫҚ ҚОРҒАУ ОРГАНДАРЫ КЫЗМЕТКЕРЛЕРІМЕН КЕЗДЕСУ

       Т.Рысқұлов аудандық прокурорының орынбасары Шыңғыс Наурызбаев жасөспірімдер арасындағы құқық бұзушылықтың алдын алу мақсатында  Құлан агротехникалық жоғары колледжінің студенттерімен кездесті.  Кездесуге Т.Рысқұлов аудандық полиция бөлімінің  жергілікті полиция қызметінің ювеналды полиция тобының инспекторы Ж.Егембердиев, Т.Рысқұлов аудандық  Жастар ресурстық орталығының  жастар ісі жөніндегі бөлім басшысы Тоқтасын Тоқсаба Қайратұлы, колледж директоры Мусакулов Олжас Нурланұлы мен студенттер қатысты.    

        Кездесу барысында сот төрағасы тәлім-тәрбие жөнінде сөз өрбітіп,  студенттерді қылмыстық, азаматтық, әкімшілік құқықбұзушылық құқықтарымен таныстырды. Сонымен қатар студенттер заң қызметкерлерінің  темекінің зияндығы, зорлық-зомбылықтың алдын алу сынды тәрбиелік-құқықтық кеңестерін тыңдап,  көкейлеріндегі сауалдарын қойып пікір алмасты.

ТӘУЕЛСІЗДІК БӘРІНЕН ҚЫМБАТ

         Құлан агротехникалық жоғары колледжінде Тәуелсіздік мерекесіне арналған «Тұғыры биік-Тәуелсіздік» атты салтанатты шара өткізілді.  Шараға  колледждің әкімшілігі мен оқытушылар құрамы және студенттер қатысты. Кеш Қазақстан Республикасының гимнімен ашылды.

Салтанатты шара өнерпаз студенттердің мерекелік концертіне ұласып, патриоттық әндер орындалды. Сондай-ақ ел тарихынан көріністер көрсетіліп, желтоқсан құрбандарына арналған арнау өлеңдер көрермендерге патриоттық рух сыйлады.

Мерекелік кеште колледж директорының кәсіптік оқыту жөніндегі орынбасары Ертаев Еркебұлан Ерікұлы ұлтымыздың ұлық мерекесі Тәуелсіздік күнімен құттықтап, колледждің белсенді студенттерін марапаттады.

Кеш шымылдығы «Көк тудың желбірегені» әнімен  жабылды.

ТӘУЕЛСІЗДІК КҮНІНЕ ОҚЫРМАНДАР КОНФЕРЕНЦИЯСЫ ӨТТІ

        Құлан агротехникалық жоғары колледжі кітапханасында  Қазақстан Республикасының Тәуелсіздігі күніне орай Т.Рысқұлов аудандық орталық кітапханасымен бірлескен «Отан тарихы әдебиеттерде» тақырыбында оқырмандар конференциясы өтті. Оқырмандардың рухани мәдениетін арттыру мақсатында ұйымдастырылған конференция барысында елдің 31 жылдық тәуелсіздігінде жеткен жетістіктері талқыланып, «Тәуелсіздікке алып келген желтоқсан оқиғасы», «Тәуелсіздік біздің ұлттық мақтанышымыз», «Тәуелсіздікке — 31 жыл» тақырыптарында баяндамалар оқылды. Сондай-ақ «Тәуелсіздік – еркін елдің ұраны» атты кітап көрмесі ұйымдастырылып, көрмеге библиографиялық шолу жасалды.