ЕҢ ҮЗДІК АУЫЛ КОЛЛЕДЖІ
24 тамыз күні Тараз қаласында өткен "Білімді ұлт: терең білім, еңбекқорлық және отаншылдық қасиет" тақырыбында өткен облыстық білім қызметкерлерінің Тамыз конференциясында Құлан агротехникалық жоғары колледжі облыстық "Ең үздік ауыл колледжі" атағымен марапатталып, облыс әкімі Н. Нұржігітов оқу орнына 500 000 теңге көлеміндегі сертификатты табыстады. Колледж ұжымы еңбегінің жемісі құтты болсын!
ОБЛЫС ӘКІМІ КОЛЛЕДЖ ТЫНЫСЫМЕН ТАНЫСТЫ
22 тамыз күні Жамбыл облысы әкімінің Т.Рысқұлов ауданына жұмыс сапары барысында облыс басшысы Нұржігітов Нұржан Молдиярұлы, облыстық білім басқармасының басшысы Бейқұт Жамангозов, Т.Рысқұлов ауданының әкімі Ернар Есіркепов Құлан агротехникалық жоғары колледжінің материалдық- техникалық базасымен, тыныс тіршілігімен, даму перспективаларымен танысып, колледж ұжымының жұмысына оң бағасын беріп, қолдау көрсетті.
ЕҢБЕК НАРЫҒЫ ЖӘНЕ КӘСІПТІК БІЛІМ: ЖАҢА МҮМКІНДІКТЕР
2022 жылдың 16 тамыз күні Құлан агротехникалық жоғары колледжінде «ЕҢБЕК НАРЫҒЫ ЖӘНЕ КӘСІПТІК БІЛІМ: ЖАҢА МҮМКІНДІКТЕР» техникалық және кәсіптік білім беру педагогтеріне арналған Республикалық тамыз конференциясының практикалық бөлімі өткізілді. ҚР Оқу-ағарту министрлігінің техникалық және кәсіптік білім департаментінің директоры Оспанова Насымжан Жамбекқызы, «Talap» КЕАҚ президентінің м. а. Татибеков Санжар Меирханович басқарған топ колледж базасымен, «Жас маман» жобасы аясында алынған техника және құралдардың жұмысымен танысып, оқу орнының дамуына оң бағасын беріп, өңірдің экономикасына қажетті мамандар даярлауда сәттілік тіледі.
ЖАС МАМАНДАР - ТӘУЕЛСІЗ ЕЛ ҚЫРАНЫ
Құлан агротехникалық жоғары колледжінде 29 маусым күні биылғы оқу жылының бітіруші түлектеріне арналған «Жас мамандар - тәуелсіз ел қыраны» атты диплом табыстау шарасы өтті. Диплом тапсыру салтанатына әлеуметтік серіктестер, колледж оқытушылары, ата аналар қатысып, 137 түлекке диплом тапсырылды. Оның 15-і үздік диплом иегері атанды. Колледж қабырғасында оқи жүріп, қоғамдық жұмыстарда белсенділік танытқан, білімді де назардан тыс қалдырмаған студенттерге колледж әкімшілігі тарапапынан алғыс хаттар табыс етілді. Дипломдарды табыстау салтанатты рәсімінің қорытынды бөлімінде колледж түлектері 4 жыл білім нәрімен сусындатқан оқытушыларына өздеріне берген білімдері мен кәсіби дағдылары үшін ризашылықтарын білдірді.
Өмірге жолдама алып, жас маман атанып ұядан ұшқан түлектерге, қойылған мақсаттарға қол жеткізуде табанды болуға тілек білдіріп, Жаңа Қазақстанның өсіп өркендеуіне, ауылшаруашылығы саласының дамуына лайықты үлес қосатынына үміт артамыз. Колледж ұжымы өз түлектеріне табыс тілейді. Ақ жол!
МЕМЛЕКЕТТІК РӘМІЗДЕР - ЕЛ МӘРТЕБЕСІ
Құлан агротехникалық жоғары колледжінде Қазақстан Республикасының Мемлекеттік рәміздер күнінің 30 жылдығына орай «Мемлекеттік рәміздер - ел мәртебесі» тақырыбында іс-шара өткізілді. Рәміздердің пайда болуы және тарихтағы маңызы жайлы түсіндіріліп, студенттерді Отан сүйгіштікке, адамгершілікке, Отанына, халқына адал қызмет етуге, елінің Туын, Елтаңбасын, Әнұранын қастерлеп, құрметтеуге, халқының тегін, тарихын білуге тәрбиелеу мақсатында өткізілген іс-шарада студенттер флешмоб билеп, патриоттық әндер орындап, бейнероликтер тыңдап, көк байрағымыз көкте желбіреп, елтаңбамыз ел төрінде нық тұрып, әнұранымыз аспанда қалықтаса – ол мемлекет мерейінің үстем, мәртебесі биік екенін, халқымыздың бірлік пен берекеде өмір сүріп жатқанын айғақтайтынына көз жеткізді.
МЕМЛЕКЕТТІК РӘМІЗДЕР –ТҰТАСТЫҚТЫҢ БЕЛГІСІ
Құлан агротехникалық жоғары колледжінің кітапхана қызметкерлерінің ұйымдастыруымен Қазақстан Республикасының Мемлекеттік Рәміздерінің 30 жылдығына орай «Мемлекеттік Рәміздер –тұтастықтың белгісі» тақырыбында танымдық сағат өтті. Мемлекеттік нышандарға арналған іс-шараның мақсаты жастарға Мемлекеттік құндылықтарымыз туралы мәлімет беру, Рәміздерді құрметтеуге, қастерлеуге дағдылау. Танымдық сағат барысында Мемлекеттік Рәміздеріміздің шығу тарихы, Рәміздер туралы Заң және Рәміздерге енгізілген өзгертулер туралы мәліметтер берілді, «Мемлекеттік Рәміздер –елдігіміздің негізі» тақырыбындағы кітап көрмесіне шолу жасалды және Отан туралы мақал-мәтелдер айтылып оқырмандардың дүниетанымы кеңейді.
«ЖАС МАМАН» жобасы - кәсіби дамудың негізі
Құлан агротехникалық жоғары колледжінің педагогтері «Talap» КЕАҚ мен Қарағанды облысы білім басқармасының Абай көпсалалы колледжінің ұйымдастыруымен өткізілген «Жас маман» жобасы - білім беру процесін іске асырудың инновациялық нысандарын енгізудің өзекті құралы» тақырыбында өткізілген аграрлық бағыттағы республикалық ғылыми - практикалық конференцияға қатысты.
4 бағыт бойынша ұйымдастырылған іс-шараға агрономия құзіреттілігі бойынша оқу орнында «Жас маман» жобасы шеңберінде атқарылып жатқан жұмыстар туралы бейнеролик ұсынылып, колледж І дәрежелі дипломмен марапатталды. Директор орынбасарлары Е.Ертаев пен М.Багылбекова ветеринария саласы бойынша атқарылған колледждің іс-тәжірибелерімен бөлісіп, сертификат иеленді.
ҚАСІРЕТТІ ЖЫЛДАР ЖАҢҒЫРЫҒЫ
Құлан агротехникалық жоғары колледжінде «Ашаршылық және қуғын-сүргін құрбандарын еске алу күніне» орай «Қасіретті жылдар жаңғырығы» тақырыбында еске алу кеші өткізілді. Кештің мақсаты студенттердің отаншылдық сезімін арттыра отырып, қиындыққа төзе біліп, болашаққа деген сенімдерін жоғалтпауға тәрбиелеу, Қасіретті жылдар кезіндегі Сталинизмнің орнығуы, жазалау шараларын, халық қасіретін дәріптеу. Кеңес Одағы кезіндегі Қазақстанда салынған еңбекпен түзеу лагерлерінің тарихына шолу жасалынды. «Қанмен жазылған хат, Алжир лагерлер» видеороликтер көрсетіліп, репрессия құрбандарына арналған арнау өлендері оқылды. Бүгінгі жас ұрпақ бабаларымыздың қанмен жазылған тарихын біліп –өсіп, оған құрмет көрсетіп, ұрпақтан-ұрпаққа жеткізу үшін қажет іс-шара болды.
ЖЕҢІС ТҰҒЫРЫНАН КӨРІНДІ.
Салауатты өмір салтын қалыптастыру, спортпен шұғылдану – деніміздің сау болуының негізгі кепілі. Жуырда Жамбыл облысы әкімдігінің білім басқармасының ұйымдастыруымен Техникалық және кәсіптік, орта білімнен кейінгі білім беру ұйымдарының педагогтері мен қызметкерлері арасында бұқаралық спорт түрлерін дамыту және танымал ету мақсатында спартакиада өтті. Тартысты өткен жарысқа Жамбыл облысы әкімдігінің білім басқармасының Құлан агротехникалық жоғары колледжінің директоры О.Н.Мұсақұлов бастаған спортшылар командасы да қатысып сынға түсті.
Бәсекеге қатысушылар спорттың төрт түрі, атап айтқанда, волейбол (ерлер мен әйелдер арасында), шағын футбол (ерлер арасында), үстел тениссі (ерлер мен әйелдер арасында) және тоғызқұмалақ (ерлер мен әйелдер арасында) бойынша бақ сынады.
Екі күнге созылған жарыста колледж командасы қарсыластарының алдын орап, аса шеберлікпен көзге түсті. Жарыс қорытындысы бойынша Құлан агротехникалық жоғары колледжінің спортшылар командасы волейболдан (ерлер мен әйелдер арасында) – І орын, шағын футболдан (ерлер арасында) – І орын, үстел тениссі (ерлер арасында) – І орын иеленіп колледж мерейін үстем етті.
СТУДЕНТТЕР КОНФЕРЕНЦИЯСЫ
Құлан агротехникалық жоғары колледжінің әдістемелік жұмыс жоспарына сәйкес «Ғылымға алғашқы қадам» тақырыбында студенттердің дәстүрлі ғылыми - тәжірибелік конференциясы өтті.
Конференция нәтижесінде келесі міндеттер жүзеге асырылды:
Конференцияға колледждің 9 студенті әдістемелік кеңеспен бекітілген тақырыптары бойынша жетекшілерімен жүргізген жұмыстарының нәтижелерін ұсынды.
Жеңімпаз студенттер дипломмен, қатысушылар алғыс хатпен марапатталды.
Құлан агротехникалық жоғары колледжінде 2022 жылғы 5 маусымда республикалық референдум өткiзу туралы студенттермен жалпыхалықтық референдумның маңызы талқыланды. Студенттер референдумға қатысып, саяси науқанның әділ әрі жоғары деңгейде өтуіне үлес қосатындықтарын жеткізді. Республикалық референдум - Қазақстан Республикасы Конституциясының, конституциялық заңдарының және мемлекет тіршілігінің өзге де неғұрлым маңызды мәселелері жөніндегі шешімдері бойынша бүкілхалықтық дауыс беруді іске асыруда әрбір қазақстандықтың пікірі маңызды екенін айтылды. Референдум аясында Ата заңға нақты қандай түзетулер енгізілетіні түсіндірілді.
Колледж ұжымы референдумға қатысуды ел болашағына елеулі өзгерістер әкелетін тарихи сәт деп біледі. Құлан агротехникалық жоғары колледжінің ұжымы мен студенттері конституциялық өзгерістерді қолдайды. Маусымның 5-і күні өтетін референдумға бір кісідей атсалысуға әзір екендіктерін айтты.
СТУДЕНТТЕР ТЕХНОЛОГИЯЛЫҚ ТӘЖІРИБЕДЕН ӨТУДЕ
Құлан агротехникалық жоғары колледжінің 3 курс «Сүт өнімдерінің өндірісі» мамандығының студенттері өздерінің технологиялық тәжірибелерін колледжінің әлеуметтік серіктесі «Меркі ірімшік зауыты» цехтарында өтті. Тәжірибе барысында студенттер өздерінің теориялық білімдерін тәжірибе жүзінде жетілдіріп сүттің физика – химиялық қасиеттерін анықтауды, сүтті, сұйық диеталық сүт өнімдерін, май өнімдерін, ірімшік өнімдерін өндіруді бақылады, дайын өнімдерді орауды, маркировка жасауды, сақтауды үйренді. Сонымен қатар шикізаттың шығын нормасын есептеуді, өнімдер шығарғанда жасайтын тіркеулермен есептерді орындауды, өнімнің сапалық куәлігін толтырудыда меңгерді.
ҚҰҚЫҚ БҰЗУШЫЛЫҚТЫҢ АЛДЫН АЛУ
Тұрар Рысқұлов аудандық АПБ ЖПК ЮПТ аға испекторы, полиция майоры Д.Жанасов, колледж инспекторы Ж.Егембердиев және Т.Рысқұлов ауданы әкімдігінің ішкі саясат бөлімінің жастар ресурстық орталығының мамандарымен «Жасөспірімдер арасындағы құқық бұзушылықтың алдын алу» тақырыбында жасөспірімдер арасында зорлық –зомбылық пен күш көрсетудің алдын алу , тәртіпсіздіктер мен құқықбұзушылықтың алдын алу шараларын күшейту мақсатында Құлан агротехникалық жоғары колледжінің студенттерімен кездесті. Бүгінгі күнгі қоғамның алдында тұрған басты міндеттердің бірі - балалар мен жасөспірімдер арасындағы құқық бұзушылықтың алдын-алу, кәмелетке толмағандар арасындағы қылмыстың өсуіне жол бермеу керек екенін, сонымен қатар, студенттердің қойған сауалдарына барынша емен-жарқын жауап беріп, күрмеуі қиын мәселелерді ұстаздарымен шешуге тырысса ешқандай кереғар жағдайлардың болмайтынын тілге тиек етті.
ҮЛГІ БОЛАР ОТБАСЫ – ҚАЗАҒЫМНЫҢ АЙНАСЫ.
Құлан агротехникалық жоғары колледжінде 15 мамыр – Халықаралық отбасы күні мерекесіне орай «Үлгі болар отбасы – қазағымның айнасы» атты отбасылық сайыс өтті. Бес кезеңнен тұратын сайыс қатысушылардың өз отбасыларын бейнеролик арқылы таныстыруымен басталды.
Байқау барысында әр отбасылар өз өнерлерін көрсетіп, ситуациялық сұрақтарға жауап беріп және отбасылық сүйікті ас мәзірін ұсыну арқылы бәсекелесті. Тартысты өткен жанұялар жарысының нәтижесінде әділ-қазылар шешімімен Екибаевтар отбасы жеңімпаз атанды. Бәсекеге толы сайыс соңында қатысушыларға сыйлықтар табысталды.
ОТБАСЫ АҒАШЫ
15 мамыр – Халықаралық отбасы күніне орай Құлан агротехникалық жоғары колледжінде «Отбасылық ағашын отырғыз» акциясын өткізді. Акцияның мақсаты – отбасылық дәстүрлерді нығайту, тұрғындарды эко-саналы өмір сүруге және табиғатты қорғауға үндеу. Іс-шара колледждің «Түлектер аллеясы» аумағында өтті. Акция аясында көпбалалы және жас отбасы шырша көшеттерін отырғызды. Осы акция арқылы біз ауыл тұрғындарын «Отбасы ағашын» отырғызып, отбасылық қарым-қатынасты, ұрпақтар сабақтастығын нығайтуға шақырамыз.
ҚАЙЫРЫМДЫЛЫҚ АКЦИЯСЫ
Құлан агротехникалық жоғары колледжінде Халықаралық отбасы күні мерекесіне орай «Қамқорлық» қайырымдылық акциясы ұйымдастырылды. Бұл акцияның мақсаты – әлеуметтік көмекке мұқтаж, аз қамтылған, көпбалалы, тұрмысы қолайсыз отбасында тәрбиеленіп жатқан колледж студенттерінің отбасына әлеуметтік көмек көрсету. Қайырымдылық акция аясында колледжде білім алып жатқан көп балалы және әлеуметтік аз қамтылған студенттің отбасы азық-түлікпен қамтылды. «Мұқтаж жандарға көмек көрсету және қайырымдылық іс-шара жасау - халқымыздың ежелден келе жатқан игі дәстүрі» екенін жастар арасында насихаттаған акцияның маңызы зор. Осындай қайырымдылық акциялары әлі де өз жалғасын таба береді.
АРДАГЕРЛЕРДІ АРДАҚТАЙЫҚ
Құлан агротехникалық жоғары колледжі студенттері 9 мамыр – Ұлы Жеңіс күніне орай Т.Рысқұлов аудан орталығындағы Ұлы Отан соғысының құрбандарына арналған ескерткішке тазалау жұмыстарын жүргізді. Атқарылар жұмыстың мақсаты– жастарды Ұлы Отан соғысының ардагерлерін ардақтау, оларға құрмет көрсету, келісім мен бірлікті көздің қарашығындай сақтауға қашанда даяр болуға тәрбиелеу.
ҰРАНДЫ ЕРДІҢ – ҰРПАҒЫ ҚАЙСАР
Құлан агротехникалық жоғары колледжі, Т.Рысқұлов ауданы әкімдігінің ішкі саясат бөлімінің Жастар ресурстық орталығымен Луговой әскери гарнизонының қызметкерлері бірлесіп мемлекетіміздің айбынды мерекесі 7 мамыр - Отан қорғаушылар күніне және Қазақстан Республикасының Қарулы Күштеріне 30 жыл толуына орай «Ұранды ердің – ұрпағы қайсар» тақырыбында мерекелік іс-шара өткізді. Іс-шараның мақсаты отан сүйгіштік, ұлтжандылық қасиеттерді дәріптеу, студенттерді Отанын, елін қорғай білуге тәрбиелеу. Колледжде өткен мерекелік іс-шара барысында ауданымыздың мәдениет саласының қызметкерлері патриоттық әндермен көпшіліктің көңілін көтерді.
WORLDSKILLS JAMBUL-2022
WorldSkills чемпионаты бүгінде техникалық және кәсіптік білім беретін мекемелер арасында жыл сайын өткізілетін, жұмысшы мамандықтарының әуелетін арттыруға зор ықпал ететін бірден-бір сайыстардың бірі. Жамбыл облысы әкімдігі білім басқармасының ұйымдастыруымен №7 Бетқайнар колледжінің оқу базасында өткен «WorldSkills Jambul-2022» облыстық чемпионатына Құлан агротехникалық жоғары колледжінің студенттері «Аспаз ісі», «Электромонтаж», «Пісіру технологиялары», «Киімдерді үлгілеу және дизайн» және «Веб-дизайн» құзыреттіліктері бойынша қатысып, кәсіптік біліктіліктерін көрсетті. Чемпионаттың нәтижесі бойынша «Веб-дизайн» құзыреттілігі бойынша қатысушы Е.Қайыпжан (жетекшісі Ә.Бекназарова) және «Электромонтаж жұмыстары» құзыреттілігі бойынша А.Бакулин (жетекшісі Б.Ауғанбаев) 2 орын, «Пісіру технологиялары» құзыреттілігі бойынша Н.Татыбаев (жетекшісі Ғ.Рахимов) және «Аспаз ісі» құзыреттілігі бойынша Ардақ Керимкулова (жетекшісі М.Аденов) 3 орын иеленіп колледж мәртебесін асқақтатты.
ТАТУЛЫҚ – ДОСТЫҚТЫҢ КИЕЛІ БЕСІГІ
Құлан агротехникалық жоғары колледжінде 1 мамыр – Қазақстан халықтарының бірлігі күніне орай еліміздегі түрлі ұлт өкілдерінің бір-біріне деген сый-құрметін арттырып, татулықты, бірлікті, ортақ құндылықтарды насихаттау мақсатында мерекелік кеш өтті. Іс-шара барысында колледж студенттері еліміздегі этностардың ұлттық билерін билеп, әндерін орындады. Мерекелік кеш соңында 1 мамыр мерекесімен құттықтау челенжін ұйымдастырылды.
Powered by aSc EduPage
